Musanze kimwe n’utundi turere 30 tugize u Rwanda, ukaba umujyi wa kabiri mu twunganira umujyi wa Kigali, ukaba urangwa n’urujya n’uruza rwa ba mukerarugendo bakurikiye ibyiza nyaburanga biwugize byiganjemo Parike y’Ibirunga n’ibindi . Abahatuye ndetse n’abahagenda batangaza ko nta Covid-19 ikiharangwa.
Nubwo byifashe gutya ariko, ubwo ishyirahamwe ry’abanyamakuru barwanya SIDA “ABASIRWA” basuraga ibitaro bya Ruhengeri, hagaragaye ikinyuranyo cy’ibyo bamwe mu baturage bo muri aka karere n’abahagenda bibwira, kuko muri serivise y’umuhezo bakiriramo abarwayi ba Covid-19 hasanzwemo umurwayi, ndetse n’umuganga ukuriye iyi serivise atangaza ko hakigaragara abanduye Covid-19. Gusa uwagaragayeho uburwayi ntarembye, ahabwa imiti afatira mu rugo akanubahiriza n’ingamba zo kudakwirakwiza iki cyorezo harimo kwiha akato.
Abaturage baragaza yuko “Nta Covid-19 ikirangwa muri Musanze”
Mboneza Roberto, umusore utuye mu karere ka Musanze, akaba acururiza imyenda mu isoko rya kijyambere rizwi nka Goico, atangaza ko icyorezo cya Covid-19 cyarangiye, ko ibijyanye n’ingamba zo kucyirinda bazihagaritse.
Ati “Hano mu isoko ntabwo tukireba kubijyanye na covid -19 iyi ndwara twebwe tubifata nkibitakibaho niyompamvu ubwirinzi bwayo kuri twebwe butakitureba. Nkuburyo bwakoreshwaga mu kwirinda, kwambara agapfukamunwa, gukaraba intoki n’amazi meza n’isabune cyangwa gukoresha umuti wa sanitayiza byahindutse umugani rwose”.
Ibi abihuriyeho na Kamaliza Claudine twahinduriye amazina kuko atashatse ko amazina ye agaragara mu itangazamakuru, usanzwe ukora muri hoteli imwe iherereye mu murenge wa Muhoza, yakira ba mukerarugendo banyuranye.
Agira ati “Mbere wasangaga abatugenderera muri hoteli aho nkora barasabwaga kubanza kugaraza y’uko bipimishije Covid-19, ingamba zo kwirinda zarashyizwemo imbaraga cyane ndetse natwe abakozi twambara udupfukamunwa, kuba harahagaritswe ingamba zo kwirinda icyorezo cya covid -19 bikaba byaratewe n’uko nta Coivid-19 ikirangwa muri aka karere kacu”.
Ibitaro biti “Covid-19 iracyagaragara”
NDUWAYEZU Gilbert, ukuriye iki nderabuzima cya Musanze laboratwari y’ibitaro bya Ruhengeri, atangaza ko muri ibi bitaro bafite ubushobozi bwo gupima Covid-19 mu buryo bubiri, haba mu gukoresha uburyo bwihuse (Rapid test) n’ubundi busanzwe buzwi nka PCR, aho ibisubizo bitangwa binyujijwe mu butumwa bugufi (sms), akaba yaremeje ko muri ibi bihe Covid-19 yagenjeje make batakigira umubare munini w’abipimisha, ariko hari abo bakiyisangamo.
Ati “Muri iyi minsi ibintu bisaba ibisubizo bya Covid-19 bisa nk’aho byagabanutse, hari igihe bushobora kwira nta muntu wapimishije Covid-19. Dupima abantu batarenze 10 mu cyumweru, mu byumweru bibiri bishize mu bo twapimye abasanganywe Covid-19 ni 2 mu bantu 20. Mu minsi ishize nibwo ikigo gishinzwe iterambere mu Rwanda RDB yatangaje ko abakerarugendo bazajya bajya gusura ingagi bambaye agapfukamunwa gusa nta kwipimisha Covid-19, twakiraga hagati y’abantu 5 na 15 cyangwa bakarengaho gato ku munsi.”
Abiraye bakanguke…
Umuyobozi w’akarere ka Musanze wungirije ushinzwe imibereho myiza y’abaturage, Kamanzi Axelle, kuri uyu wa kabiri tariki 6 Kanama 2023, yatangaje ko nk’ubuyobozi batavuga ko Covid-19 yarangiye nubwo hakozwe ibishoboka ku bufatanye n’inzego zinyuranye bagamije guhashya iki cyorezo.
Ati “Ntabwo twavuga ko Covid-19 yarangiye kuko n’ubu hari abantu babiri bagaragaye ko bafite Covid-19, ariko ubukangurambaga burakomeje kugira ngo abaturage badakomeza kwirara bumva ko Covid-19 yarangiye.
Akarere ka Musanze kagizwe n’imirenge 15 ituwe n’abaturage 438,482, byagaragaje ko kuva icyorezo cya Covid-19 cyagera mu Rwanda tariki 14 Werurwe 2020 kugeza muri uku kwezi kwa Kanama 2023, abaturage 7230 ari bo bakirwaye, gihitana abagera kuri 69.
NDABATEZE Jean Bosco