Philippe Hategekimana yakatiwe igihano cy’igifungo cya burundu mu Rukiko rwa Rubanda i Paris, ahamijwe ibyaha bya Jenoside n’ibyibasiye inyokomuntu, mu cyumweru gishize tariki ya 28 Kameza 2023.
Hategekimana Philippe uzwi ku izina rya Biguma yatangiye kuburana ku wa 10 Gicurasi 2023, mu rubanza urukiko rwamaze ibyumweru birindwi rutega amatwi abatangabuhamya batandukanye basaga 100.
Abatangabuhamya benshi bavuze ko ‘Biguma’ yari umuntu ukomeye mu bitero byibasiye abatutsi, bakorana n’interahamwe kugira ngo bice abantu ibihumbi hirya no hino mu karere, Nyanza cyane cyane Abatutsi bari ku misozi ya Nyamure, Nyabubare, ISAR-SONGA n’ahandi muri Nyanza.
Abenshi muri bo agaragaje ko Biguma hari aho yagiye ategeka abajandarume kwica Abatutsi mu bice bitandukanye abandi bamushinja ko na we ubwe hari abantu yiyiciye, barimo uwari Burugumesitiri wa Komine Ntyazo witwa Nyagasaza Narcisse.
Uyu wahoze ari umujandarume kuri ubu akaba afite imyaka 67 y’amavuko yabaga mu Bufaransa ku mazina ya Philippe Manier. Mu gihe cya Jenoside yakorewe Abatutsi yari Umujandarume afite ipeti rya Adjudant-Chef akorera muri Gendarmerie ya Nyanza.
Hategekimana yanze gufata icyemezo mu gihe cy’iburanisha, atanga itangazo rigufi cyane ryo gutangaza ko ari umwere ku mpera z’ibyumweru 6 by’ibimenyetso. Hategekimana yari yabwiye urukiko ko atazongera kugira icyo atangaza ku kibazo cyose yabajijwe.
Me Gisagara Richard uri mu bakurikiranye uru rubanza aho yari mu bunganiraga abarega, yavuze ko rwagoranye dore ko urega nta kintu na kimwe yigeze yemera.
UMUHOZA Eugenie
