Saa munani z’umugoroba, njya ku iduka rya kaminuza, ngeze mu kibuga mbona Angel na Amina baricaye bafite ibitabo, Angel ari gusobanurira Amina. Ndabitegereza nti”Mana yanjye, Angel burya ni mwiza imbere n’inyuma ari no gusobanurira undi mwana. Ukuntu uba ubona yaba umwiyemezi cyane!Reka nkate nyure inyuma batambona ugasanga mbakuye mu byabo.”
Nyura inyuma y’amacumbi ya Kaminuza, ngera ku iduka. Ndinjira nsanga Mama Tiana afite indorerwamo ari kwireba, yisiga utuvuta ku munwa, agahanagura kumatama, akarerembura amaso, umutwe hirya hino Ndaceceka ndamwitegereza. Akimbona ati ”Umeze ute wanjye? Nti”Meze neza. Ufite cotex?” Ati “Ndazifite nziza cyane. Aba azanye imwe. Iyi bayita Best girl, ni nziza cyane nanjye niyo nkoresha.” Ndayifata, ndayitegereza nti “Mama Tiana ko ndeba iyi cotex itameze neza!” Ati “Eeeeeh, yifata mu mayunguyungu! Utekereza se uko umuntu asa bisobanura imyitwarire ye! Nashatse Papa Tiana banseka ngoni kagufiya, ni mubi ariko se ubungubu hari ufite iduka ryiza nk’iryanjye, ni inde ufite abana beza nk’abanjye?” Ndaseka! Ati ”Iyi cotex ni nziza cyane.Imihango ntishobora guhinguka inyuma.” Nti”Ni angahe rero?” Ati”Igura igihumbi cyimwe cyonyine. Nkora mu mufuka w’ipantaro ndayamuhereza nawe aramfunyikira arayimpa.”
Mu gitondo turi mu ishuri, nsoma ibitabo hamwe n’abandi twigana nti”Imana imfashe iri somo nditsinde kuko ndarikunda pe! Patrick ati”Erega isomo ryo kubungabunga ibidukikije ni ryiza pe!” Ndeba ku isaha mbona saa mbiri zirabura itanu ndavuga nti ”Ariko se koko ubu uyumukobwa ari hehe?” Mfata telefone mpamagara nimero ye ntiyamfata, ndongera biba uko. Mwarimu aba arinjiye ati”Mwaramutse.” Abandi bati”Mwaramutse neza mwarimu.” Ngira umujinya nkubita telefone ku ntebe nti “ Uri hehe wowe ?” Mwarimu ati”Linda ni iki cyabaye?” Aranganya aturaranganyamo habura umusubiza. Patrick araranganya amaso ati”Muziko twese tutuzuye? Angel ari hehe?” Ndimyoza!Olivia yubura umutwe , aramuhema ati”Patrick ni gute wata igihe ku mukobwa mukuru nk’uriya. Ubu se yari ayobewe ko hari isuzumabumenyi uyu munsi!” Mwarimu atangira kuduhereza impapuro ziriho ikizami.
Nyuma y’ikizami nsohoka mu ishuri niruka nerekeza ku macumbi, njya kwa Angel nsunika urugi mpuza amaso nawe,arikanga!Nti”Nyagasani, Angel uriryamiye nta soni? Twakoze isuzumabumenyi wibereye mo hano? Nagutegereje, mpamagara telefone yawe ukanga kunyitaba ubibona?”Avuga buhoro buhoro arandaga ati “Linda ndananiwe cyane, ntago meze neza!” Nti “Wabaye iki?” Ati “Ejo nahuye n’inshuti zanjye tumaze igihe tutabonana, turanywa, turarya kuva mu gitondo kugeza nijoro. Naraye ntashye nasinze, mu gitondo mbyukana umunaniro mwinshi cyane ku buryo ntari kubasha gukora ikizami.” Nti”Nyagasani! Ubu se ngufashe iki?” Ati “Linda kuba ugeze hano byibuze binyeretse urukundo, ba ugiye nkomeze nduhuke.”
Ngeze ku muryano w’icyumba cyanjye, ndakingura ndinjira. Claudia ati”Ooooooh Linda urakoze kuza, ngufitiye amakuru ashyushye!” Ndaseka, nicarana nawe ku buriri nti ”Kagire inkuru rero!” Ati”Ongeraho n’umunwa wo kuyibara!Waba uzi ibyabaye iri joro?” Nti”Iri rishize se?” Ati”Yego.” Nti “Ntabyo nzi!” Azunguza umutwe kanura amaso, areba hejuru araseka ati”Ahaaa ni akumiro!” Nti”Claudia,mbabarira umbwire wikomeza kunyicisha amatsiko, ndakuzi ubwo ari wowe wabona unkinisha!” Ati”Uzi ibyabaye kuri wa mucuti wawe Angel?” Nti”Ni ibiki se?” Ati”Yaraye aje yasinze atabasha kujyenda abagabo bamutwaye mu maboko, barinda bamugeza ku buriri. Unyumvire nawe we, umuntu w’inkumi!” Nzunguza umutwe nifata mapfubyi nti”Mana yanjye!”
Biracyazaaaaa
ITANGAMAHORO Nadine
