Impuguke mu buzima bwo mu mutwe Dr. Sebera Fidèle, akaba abarizwa mu Ishyirahamwe ryiyemeje kurwanya Igicuri mu Rwanda, avuga ko mu gihugu hari umubare munini w’abafatwa n’indwara y’Igicuri ugereranyije n’ikigero cy’ababoneka ku rwego mpuzamahanga, ariko ngo ikibazo ni uko Abanyarwanda benshi bagifata ubu burwayi nk’amarozi cyangwa umuvumo uturuka ku mashitani n’ubupfumu.
Mu Ntara y’Amajyepfo y’u Rwanda hatangiye ubushakashatsi bucukumbuye ku cyaba cyihishe inyuma y’ubwiyongere bw’abarwayi b’igicuri muri yo Ntara, intego ikaba ari ugushyiraho ingamba zo kwirinda impamvu zishobora kuba zirimo kongera abafite ubwo burwayi.
Indwara y’Igicuri ishyirwa mu ndwara zo mu mutwe kuko ifata umuntu ikamutura hasi nyuma yo gutera imikorere mibi y’imyakura ijyana ikanavana amakuru ku bwonko. Iyo ndwara iyo ifashe umuntu aragagara, agatakaza ubwenge, akazana urufuzi mu kanwa kandi biza bitunguranye ku buryo umuntu ashobora guhita yikubita hasi.
Mu Rwanda, iyo ndwara yagiye ifatwa nk’amarozi cyangwa amashitani, ariko uko imyaka igenda ishira n’ubuvuzi bukiyongera abantu batangiye kugenda bayimenya n’icyaba kiyitera nubwo bikiri ku rwego rwo hasi cyane
Muri gahunda yiswe “Gusobanukirwa impamvu y’ikigero kiri hejuru cy’indwara y’Igicuri mu Rwanda binyuze mu Bushakashatsi bugamije kumenya ibyago biyitera”, abashakashatsi batangiye kwinjira mu muzi w’icyaba gitera iyo ndwara ivugwaho kuba umubare w’abo ifata wiganje mu Ntara y’Amajyepfo.
Imibare itangwa n’Ishami ry’Umuryango w’Abibumbye ryita ku Buzima (OMS) igaragaza ko hejuru ya 85 by’abafatwa n’indwara y’Igicuri baboneka mu bihugu bikiri mu nzira y’amajyambere, ariko cyane cyane mu bihugu byo muri Afurika yo munsi y’Ubutayu bwa Sahara aho ikigereranyo cy’abafatwa n’igicuri kibarirwa kuri 1.6%.
Mu Rwanda ho birakabije kuko bivugwa ko abarwayi b’igicuri babarirwa ku kigero cya 4.8%.
Ubushakashatsi bw’ibanze bwatangirijwe ku mugaragaro ku Bitaro Byitiriwe Umwami Faisal mu Cyumweru gishize, aho biteganyijwe ko buzatanga ishusho ngari n’amakuru arambuye ku birebana n’umubare w’abarwayi b’Igicuri uri hejuru mu Rwanda.
Impamvu nyamukuru si iyo kubara ingano y’abafite icyo kibazo gusa cyangwa impamvu zibitera cyane cyane mu byaro byo mu Ntara y’Amajyepfo, ahubwo hazanarebwa niba aho umuntu atuye hashobora kugira uruhare mu kongera ibyago byo kurwara Igicuri.
Gahunda y’ubushakashatsi itangaza ko gutahura impamvu zitera indwara y’Igicuri mu Rwanda ari ingenzi cyane mu rugendo rwo gutangira gushaka ingamba zo kuyikumira.
Ni muri urwo rwego itsinda ry’abahanga mu buvuzi bw’indwara zo mu mutwe batangaje ko ubushakashatsi batangiye buzagendana no gusuzuma abaturage bo mu byaro bitandukanye.
Ubundi bushakashatsi bwo kuri urwo rwego bwakozwe mu mwaka wa 2021 n’abashakashatsi umunani mu Ntara y’Amajyaruguru, aho abantu 2,681 barimo abagore 56.14% basuzumwe.
Mu bantu 128 basanzwe bahura n’ubwo burwayi bakavurwa, bivugwa ko 47.7% muri bo basanganywe Igicuri bazabana na cyo ubuzima bwabo bwose.
Ubushakashatsi bwatangajwe n’Ikigo cy’Igihugu gishinzwe Iterambere ry’Ikoranabuhanga mu Buvuzi cyo muri Leta Zunze Ubumwe z’Amerika, bwemeje ingano y’abarwayi b’Igicuri bavugwa mu byaro.
Mu Rwanda, ubushakashatsi bwakozwe urugo ku rundi mu byaro byo mu Karere ka Musanze, bwagaragaje ko abahura cyangwa bafite ibyago byo kurwara igicuri babarirwa ku kigero cya 49.3%, bishimangira ko umubare munini w’abarwaye Igicuri uboneka cyane mu bice by’icyaro kurusha mu mijyi.
Dr. Nkeshimana Menelas, Umuyobozi w’Ishami rishinzwe iterambere ry’abakozi muri Minisiteri y’Ubuzima, yasabye abaturage kureka kwitiranya indwara y’igicuri n’ubupfumu cyangwa amarozi.
Yashimangiye ko igicuri kidaterwa n’amarozi cyangwa amashitani nk’uko biri mu myumvire y’abaturage benshi, agaragaza ko ubushakashatsi bukomeje buzarushaho kugaragaza neza impamvu muzi y’ubwo burwayi n’uburyo bunoze bwo gukumira cyangwa kuvura umuntu wahuye na bwo.
Dr. Sebera na we yashimangiye ko bibabaje kuba u Rwanda rufite umubare munini w’abafatwa n’indwara y’igicuri ariko abenshi bikaba batagifata nk’indwara, ahubwo abantu bakabyitiranya n’amarozi cyangwa ubupfumu.
Ati: “Hari n’abatekereza ko Igicuri cyandura. Abarwayi b’Igicuri baranenwa, bagahezwa ndetse rimwe na rimwe bagatotezwa. Batinyuka kujya kwa muganga gusa iyo bamaze kuremba, ariko iyo bagitora agatege usanga birukira ku bavuzi gakondo, rimwe na rimwe bakarushaho kubangiza aho kubakiza mu bigaragara.”
Impuguke mu by’ubuvuzi bw’Igicuri zemeza ko guhangana n’ubwo burwayi bigihura n’imbogamizi zirimo kuba hakiri ubumenyi buke mu baturage kuri iyo ndwara ndetse no kuba umubare w’impuguke mu buvuzi bw’indwara zifata ubwonko ukiri hasi mu Rwanda.
