Perezida Paul Kagame yakiriye indahiro ya Dr. Jimmy Gasore Minisitiri w’Ibikorwa Remezo kuri uyu wa Gatatu tariki 13 Nzeri 2023, nk’uko biteganywa n’Itegeko Nshinga rya Repubulika y’u Rwanda mu ngingo ya 118 ivuga ibijyanye irahira ry’abagize Guverinoma, aboneraho kwibutsa ko abayobozi batagomba gutinda mu tugambo ahubwoigikenewe ari ibikorwa, umusaruro uva mu byo bashinzwe.
Perezida Kagame yagize ati: “Inama ngira Gasore uhawe inshingano zo kuyobora urwego rwa Minisiteri y’Ibikorwa Remezo ntuzajye utinzwa n’abakubwira ubugambo ahubwo ukore ibintu uko ubyumva kandi ukwiriye kuba ubyumva.
Ikindi [….] Abanyarwanda ubanza dukunda kuvuga kurusha gukora, bazareke kukurangaza ngo bagushyire mu mvugo iraho. Na yo niba ihari izana umusaruro iyo ngiyo uyitega amatwi. Ikindi bagira ni uko ku wabaye Minisitriri hari ubwo yumva ko ari ku rwego rwicara rukarambya, hari abantu bakunda […..] bamwe barabugaragaza, abandi bakabihisha, ikintu cy’ikuzo mu kazi bakaba abatuma, ntibakurikirane ngo barebe, njye natumye kuko nta muntu wigerera buri hantu aho ari ho hose cyangwa nta muntu wakora buri kimwe cyose wenyine”.
Yashimiye Dr. Jimmy Gasore kuba amaze kurahira, bivuze ko yiyemeje gukorera Igihugu cye, gukorera Abanyarwanda, gukorera kuri uru rwego rw’Abaminisitiri nubwo ari inshingano zikomeye ariko bishoboka
Ati: “Umuyobozi agomba kuba yumva neza inshingano ziremereye zikubiyemo muri iyi ndahiro cyangwa se mu mirimo amaze kurahirira. Nagira ngo musezeranye mbere na mbere ko uru rwego ajemo rw’imirimo ni ibisanzwe nubwo imirimo iba myinshi kugeza kuri urwo rwego cyangwa hejuru y’urwo rwego, ariko ni ibisanzwe bikorwa n’abantu, niyo byaba bivunanye ariko ni ibishoboka.
Ariko inama namugira n’abandi banyumva batari we gusa, kandi ngire inama n’abasanzwe mu nama y’Abaminisitiri n’ahandi mu nshingano bafitiye Abanyarwanda n’Igihugu”.
Perezida yibukije ko abayobozi bafite inshingano zo gukorera Abanyarwanda.
Ati: ”Icya mbere sinzi impamvu byagomba gusubirwamo kenshi buri munsi, buri gihe, muri izo nzego zo gukorera Abanyarwanda no gukorera Igihugu, inyungu z’umuntu ku giti cye arabanza akazishyira iruhande nubwo atazibagirwa kuko buri wese afite uburenganzira bwo gushaka kuzamura intera y’imibereho ye.
Ariko icyo mvuga ni uko iyo byageze kuri izo nshingano ubanza gukorera no kuzamura ubuzima bw’abandi ari bo Banyarwanda, ari cyo Gihugu, ni cyo gikwiye kuba kibanza noneho n’iby’umuntu bikagenderamo cyangwa se bigakurikira ubwo buryo”.
Yongeyeho ati: “Icya kabiri ni ugukora ibintu bikajya mu bikorwa, bikagaragara mu bikorwa, ntabwo abantu dukorana, tuyoborana iki Gihugu, ibintu byinshi bihera mu mvugo, bihera mu nyigo, bihera mu nama ibyo byose iyo bibaye ngombwa ni byo abantu banyuramo, ni byo bakora ariko ibyo byose n’iyo wabikora wibwira ngo ni neza nta kigaragara cyavuyemo gihindura ubuzima bw’abantu navugaga ni nk’aho uba wakoze ubusa. Buri munsi mbisubiramo kenshi kubo dukorana”.
Umukuru w’Igihugu yavuze ko igikenewe ari umusaruro uturuka mu kazi, uzamura imibereho y’Abanyarwanda n’Igihugu muri rusange.
Ati: “Gushyira ibintu mu bikorwa ukabona icyavuyemo kuko n’ubundi ni cyo uba ugamije, icyavuyemo ni cyo kiramira abantu, kizamura intera n’imibereho y’Igihugu, naho ibindi byose iyo byaheze aho hagati kandi rero bisa naho abantu kenshi batumva, ari ugusubiramo, ari uguhozaho kandi ukabona abantu bageze ahantu hakaba nubwo ubaza umuntu uzi ufite imyuvire mizima ubundi ukamubaza uti habaye iki? Byagenze bite ngo ibintu ibi n’ibi nyuma y’igihe iki n’iki tube nta musaruro tubona, ukabona nta n’icyo asubiza agasaba imbabazi”.
Kuri we kandi ikibazo si ugusaba imbabazi, ahubwo ibikorwa ni byo bya mbere bikenewe.
Yagize ati: “Ikibazo si ukubababarira ikibazo ni ugusubiza icyo kibazo umuntu abajije habaye iki? Niba ibintu byagombaga gukorwa mu cyumweru kimwe abantu bategereze amezi 6 ashire numubaza ananirwe gusobanura habaye iki? Icyabuze cyangwa niba nta cyabuze, icyagombaga gukorwa mu cyumweru, mu byumweru 2, mu kwezi kuko bigomba gutegereza amezi 6. Ibi ni ibintu abantu birirwamo bibaza, ariko ibisubizo nta nubwo njye mbikenera mu magambo ahubwo mbikenera mu kubona bya bikorwa byavuye mu bintu abantu bavugaga”.
Umukuru w’Igiohugu kandi yaboneyeho kwibutsa ko ibifitiwe ubushobozi bigomba gushyirwa mu bikorwa.
Ati: “Hari byinshi tutarashobora kugeraho cyangwa tudashobora gukora muri iki gihe kubera amikoro nubwo tuba dushaka kugera kuri byinshi, amikoro akatubana make ibyo birumvikana, urategereza ugashakisha amikoro, ibyo ni byo numva bishobora kudutinza, ariko gutinzwa nuko umuntu adashobora gusobanura impamvu atakoze icyo yagombaga gukora yari afitiye amikoro n’ubushobozi ubundi mu myumvire, ugasanga ntashobora kubisubiza. Nta na rimwe njya ncyumva njyewe”.
Ndabisubiramo kuko bimaze kugera ahantu abantu bibaza icyo kibazo, kandi bakagishakira igisubizo byanze bikunze.
Ntabwo twajya aho ngo ibyo tudafitiye amikoro cyangwa ubushobozi bigendere ku ntambwe nk’ibyo dufitiye ubushobozi dushobora gukora, ntabwo bishobora kugendera hamwe ntibikwiye kuba.
Abayobozi bafite inshingano zo gukurikirana ibikorwa
Umukuru w’Igihugu yibukije abayobozi ko bagomba gukurikirana ibikorwa aho gutuma kandi ntihagire ubatera ubwoba cyangwa babavangira.
Ati: “Abayobozi bagira inshingano zo gukurikirana, gukurikira niba icyagombaga gukorwa n’uwatumwe cyangwa niba uwagombaga gukora yagikoze naho aho bipfira ni muri bya bindi navugaga bihera mu magambo ntibijye mu bikorwa.
Umuntu aratuma, uwo yatumye nawe agatuma, uwatumwe nawe agatuma, iyo hatabayeho rero gusubira inyuma ngo urebe ngo mbese uwo natumye yaratumitse, aho rero hari ikibazo, Ngira ngo nkugire inama ku giti cyawe, uri mushya ugiye muri aka kazi, ntuzajyemo ngo hagire abantu bavangavanga”.
Yongeyeho ati: “Wowe urebe akazi ibindi ubyihorere ndetse bigere aho abakora nabi badahabwa intebe yo kwicaraho, nta ntege baba banafite ntibakagire uwo bakanga, batera ubwoba ngo bitume yigengesera mu nyungu zo gukora akazi kawe, kurikirana akazi, jya mu bikorwa nibaba benshi bamwe bamenyereye kwicara mu biro [….]
Ni wowe ubayobora ntabwo wayobora abantu ngo bagutere ubwoba cyangwa ngo ahubwo ufite n’uburenganzira igihe bagize batyo rwose kuba ari wowe bikwiye kuba biturukaho bagashakirwa indi mirimo cyangwa bakajya aho bashaka kurusha kutwangiriza, ni wowe bikwiye kuba biturukaho”.
Yasabye Dr Gasore gufata iyo nshingano nshya abyumva ndetse ko ari n’umwanya mwiza wo kubivuga ngo n’abandi bakurikira babyumve.
Ati: “Hari ubwo tubivuga kenshi mu nama zindi ari iza cabinent n’izindi ariko nagira ngo nongere mbisubiremo kandi mbigeze aho bigomba kubonerwa igisubizo byanze bikunze, ntabwo twakomeza igihugu cyacu aho kiri n’ibibazo gifite ntibishaka abantu bari aho b’indangare, bavuga ngo nibagiwe cyangwa nagize ngo iki? Ikintu ni iki cyangwa ari kiriya, ibyo hagati niba ari ugushakisha bigasobanuka ko ushakisha uburyo bwo gukora ibintu bikagaragara bikamenyekana, ntibibe ikintu kiri ahongaho kitumvikana.
Nari mboneyeho umwanya wo kugira ngo mbwire n’abandi bayobozi b’izindi nzego mbabwire babyumve cyangwa na bo tuyobora na bo bumve rimwe na rimwe aho ibibazo bituruka ariko hagomba gushakirwa umuti byanze bikunze”.
Yamwifurije akazi keza no kuba yakorana n’abandi neza bimuturutseho cyangwa bibaturutseho, kandi ko akazi ko gukora ari kenshi hagomba gushyirwa imbere kugakora kagatanga umusaruro kandi kuri byinshi birashoboka.
Minisitiri w’Ibikorwa Remezo Dr Jimmy Gasore yashyizweho na Perezida wa Repubulika mu itangazo ryashyizweho umukono na Minisitiri w’Intebe mu izina rya Perezida wa Repubulika kuri uyu wa Kabiri tariki 12 Nzeri 2023.
