Bamwe mu barokotse Jenoside yakorewe abatutsi mu Rwanda 1994 batuye mu tugari twa Rango, umurenge wa Tumba, akarere ka Huye, baravuga ko kuba Dr. Sosytene Munyemana byatumye bizera ubutabera bw’u Bufaransa buri ku muburanisha ku byaha aregwa byibasiye inyokomuntu, no gushishikariza abaturage kwica abatutsi mu mujyi wa Butare.
Ibi bamwe mu barokotse Jenoside yakorewe abatutsi batuye mu midugudu ya Rango babitangarije mu nama yo kuri uyu wa 24 Ugushyingo 2023 yabereye ku Kagali ka Gitwa, umurenge wa Tumba yahuje bamwe mu barokotse Jenoside n’itsinda ry’abanyamakuru bakurikirana imanza z’abakekwaho kugira uruhare muri Jenoside zibera hanze y’u Rwanda bakorana na Pax Press, aho bivugwa ko Dr Munyemana yaba yarakoreye ibyaha ashinjwa mu rukiko rwa Rubanda i Paris.
Aho Dr Munyemana yari atuye mbere ya Jenoside
Umwe mu barokotse Jenoside utuye mu kagari ka Rango avuga ko nyuma yo kuganirizwa ku bijyanye n’uko inyangamugayo zatoranyijwe zitwara mu nkiko byatumye yizera u Bufaransa. Yagize ati “kuba ubufaransa bwayoborwa na Perezida Macro ubu abacitse ku icumu twiteze ubutabera ubundi twumvaga ko abaduhemukiye bidegembya aho mu bufaransa tukagumya gushenguka imitima”
Akomeza avuga ko hari byinshi bimaze kubagarurira ikizere ko byibuze n’iutarafatwa uri I Burayi nawe adatuje. ati “Ubundi ntabwo twari dufite icyizere cy’u Bufaransa ariko kubera ko mutuganirije mukatubwira ko mu nkiko z’u Bufaransa hari benshi bakatiwe n’urukiko rwaho, ubu nabatarafatwa ntibatuje nacyo ni igihano”.
Undi mubyeyi warokotse Jenoside avuga ko afitiye kumva ko ababahemukiye bakidegembya, bariho neza byatumaga natwe tudashyira umutima hamwe twumva ko ntakiri gukorwa ngo bafatwe ariko perezida w’ubufaransa yatugaruriye ikizere.
Yagize ati “Twumvise dutuje twagize n’ikizere ko azahanwa, mu gihe mbere twumvaga ko bidegembya kubera ko u Bufaransa butitwaye neza mu gihe cya Jenoside.”
Urubanza rwa Dr. Sosytene Munyemana rwatangiye kuburanishwa kuwa 14 Ugushyingo 2023 n’urukiko rwa Rubanda mu Bufaransa ku ruhare rwe muri Jenoside yakorewe abatutsi mu 1994 mu murenge wa Tumba no mu cyahoze ari perefegitura ya Butare.Biteganyijwe ko ruzarangira kuwa 22 Ukuboza 2023.
INGABIRE Grace
