Kuri uyu wa kane taliki 30 Gicurasi ubwo hasozwaga gahunda yo gutanga kandidatire zo mu matoro y’umukuru igihugu n’ay’abadepite azaba muri Nyakanga 2024, Diane Shimwa Rwigara uvuga ko afite porogaramu politike yibanda ku bukungu bw’igihugu cyacu, Na we yayitanze nk’ushaka kwiyamamariza kuba umukuru w’igihugu.
Diane uvuga ko umurongo wa politike we kandi wibanda kukugira umunyarwanda wihagije mu biribwa ufite aho aba, ushobora kohereza abana ku ishuri ntaguhangayika kwinshi. Avuga ko yizeye ko kandidatire ye noneho izemerwa bitandukanye n’ubushize.
Ati:”ngereranyije na 2017 nshakisha imikono ukuntu byatugoye, ariko uyu mwaka nasanze ubuyobozi butarigeze bushyiramo inzitizi nyinshi, yego ntihaburaga ibibazo ariko ugereranyije na 2017 hari itandukaniro.”
Yabajijwe n’abanyamakuru impamvu nyuma ya 2017 yari yaracecetse. Ati:”ntibivuze ko ntakurikiraga ibibera mu gihugu, ni byiza rimwe na rimwe guceceka, gutuza ukareba uko ibintu bimeze ukabanza ukanaruhuka kugirango uzagarukane imbaraga.”
Avuga ko kuba uyu mwaka ntawigeze abatambamira cyane nka mbere, ari ikintu cyiza ndetse kibaha icyizere ko n’ibindi bizagenda neza.
Ati:”Icyo navuga mu kwiyamamaza nizereko kandidatire yanjye bazayemera kuko ibisabwa byose ndabyujuje ibindi na byo nzabizana muri iyi minsi biriya bibiri bavuze. Bansabaga abantu 600 natanze 974 hafi 1000, so mfite icyizere ko kandidatire yanjye izemerwa no kwiyamamaza bikazagenda neza.”
Ikirango Diane akoresha ni Kagoma( Eagle) avuga ko agishingira ku murongo wo muri bibiliya uvuga ko Eagle ikomeza ikazamuka idacika intege kandi yihuta, akaba akunda imyitwarire yayo. Ibyangombwa bibiri yasabwe gutanga ni icyo kwa muganga ndetse n’ikigaragaza ubwenegihugu bwe, nyuma y’uko we n’abandi batanze kandidatire basoje, hazakurakiraho gusesengura kandidatire zabo, nyuma hazatangwe ilisiti y’abemerewe kwiyamamaza.
Naomi Irakoze Mugaragu.
