Ni iserukiramuco rifite umwihariko wa EXPO izaba kuva tariki 29/8-01/9/2024 I Rubavu ku mucanga bizajya bibera kuri Public beach bisorezwe muri Lake Side buri munsi. Iri serukiramuco rizaba ribaye ku nshuro ya mbere, rizibanda ku bikorwa by’imyidagaduro mu birori by’iminsi ine ndetse n’imurikagurisha ry’abaturutse hirya ni hino mu gihugu.
Kuri uyu wa 23 Kanama 2024. Ubuyobozi bwa YIRUNGA Ltd ku bufatanye n’urubyiruko rw’abakorerabushake bo mu karere ka Rubavu bagiranye ikiganiro n’itangazamakuru kigamije gusobanura imiterere n’aho imyiteguro igeze.
Iyaremye Yves umuyobozi wa Yirunga Ltd arigarukaho yagize ati:”Iri serukiramuco tubazaniye rizaba ririmo no kugaragaza umuco no kuzamura impano zitandukanye z’abakiri bato mu bugeni n’ubuvanganzo buri wese azanabona icyo ashaka kubera hazaba haberamo EXPO.”
Anavuga ko borohereje buri wese ushaka kuzaza kwidagadura cyane ko ibiciro byoroheye buri wese aho itike yo hasi ari amafaranga 500 mu gihe n’abanyacyubahiro VIP batekerejweho bakazishyura itike y’amafaranga ibihumbi bitanu ( 5000).
Muri iri serukiramuco, Abanyarubavu n’Abahagenda bashyizwe igorora ku bijyanye n’abahanzi bazabasusurutsa biganjemo abakunzwe cyane mu ruganda rw’umuziki w’u Rwanda n’abandi bakizamuka bo mu karere ka Rubavu. Hariho akarusho ko n’abandi biyumvamo impano nabo bazasaba umwanya bakigaragariza abazaba bitabiriye iri serukiramuco.
Yves ati:”Ku wa kane tariki 29 Kanama 2024 hazaririmba Nemeye Platini uzwi nka Baba cyangwa Platini, Ku wa Gatanu tariki 30 ku munsi wa kabiri w’iserukiramuco abakunzi b’injyana ya Hip Hop n’ibisumizi muri rusange bazataramirwa Riderman, Ku wa Gatandatu tariki 31 ku munsi wa Gatatu hazatarama Bull Dog, Ku Cyumweru tariki ya 1 Nzeri 2024 ku munsi wo gusoza muzataramirwa na Danny Nanone.”
Expo izajya itangira saa tatu za mu gitondo, saa munani abaririmbyi n’ababyinnyi bakomeze, hasoze umuhanzi, noneho saa yine after party ibere kuri Lakeside View kugeza amasaha akuze mu minsi ine.
Uretse kwidagadura no guhaha ibyo muri expo, hazaba hari n’ibyo kunywa n’ibyo kurya kandi ibiciro buri wese akazisangamo. Byumwihariko abanyeshuri barararitswe ngo basezere Vacance mu byishimo.
Ku makuru arambuye ndetse no kwiyandikisha ku bashaka kuzagaragaza impano zabo bahamagara 0781000112 cyangwa bakandikira Yves Iyaremye kuri yvesiyaremye@gmail.com.
Naomi Irakoze Mugaragu.
