Umunyarwanda ufite ubwenegihugu bw’Ubufaransa, Philippe Hategekimana, wari warakatiwe igifungo cya burundu kubera uruhare yagize muri Jenoside yakorewe Abatutsi, kuri uyu wa 4 Ugushingo 2024, yatangiye kuburana ubujurire mu Rukiko rwa Rubanda rw’Ubujurire rwa Paris.
Me Richard Gisagara, wunganira abaregera indishyi, avuga ko n’ubwo ari ubujurire urubanza rw’uyu Hategekimana wiyise Manier agenze mu Bufaransa (ubusanzwe uzwi ku kabyiniriro ka Biguma), rugiye gutangira bundi bushya.
Agira ati “Ubungubu iburana ritangiye ni iburana rishyashya rizagenda nk’uko ryagenze ubwa mbere.”
Me Emmanuel Altit, wunganira Hategekimana, we avuga ko we n’umukiriya we biteguye gusaba urukiko gusuzuma ibimenyetso bya buri buhamya, bagahabwa ubutabera bukwiye.
Agereranya imiterere y’inkiko zombi, Me Gisagara avuga ko uhamijwe ibyaha mu Rukiko rwa Rubanda rwa Paris ahabwa iminsi icumi yo kujurira umwanzuro w’urukiko. Iyo ubujurire bwe bwemewe, urubanza ngo rusubira kuba rubisi bakongera gutumaho abatangabuhamya bose babajijwe mu Rukiko rwa Rubanda.
Ku wa 28 Kamena 2023, Urukiko rwa Rubanda rwa Paris rwari rwamuhaje icyaha cya Jenoside n’ibyaha byibasiye inyoko muntu n’ubufatanyacyaha mu byaha byibasiye inyoko muntu.
Hategekimana wari Umuyobozi Wungirije wa Jandarumori muri Nyanza ya Perefegitura Butare, bivugwa ko ibi byaha yabikoreye mu duce twa Nyamure, Nyamugari, Nyabubare, ISAR-Songa no mu tundi duce yayoboraga.
Oswald Niyonzima
