Bamwe mu bafatanyabikorwa b’Akarere ka Bugesera basanga gukoresha ikarita nsuzumamikorere birimo gutanga umusaruro kuko bituma ibibazo byihutirwa bikemurwa vuba.
Mu gukusanya ibibazo by’abaturage hakoreshejwe ikarita nsuzumamikorere, habanza inama ya mbere y’abaturage bakagaragaza ibibazo byabo, inama ya kabiri igahuza abaturage n’abatanga serivise impande zombi zikabiganiraho, naho inama ya gatatu ikabera ku murenge haganirwa ku bibazo byakusanyijwe bitakemukiye ku Kagari no gutegura raporo ijyanwa ku karere. Inama ya kane ni iyo ku rwego rw’akarere, iba igamije gukora ubuvugizi ku bibazo bitakemukiye ku murenge.
Iyi ni na yo yabaye mu mpera z’iki cyumweru dusoje, ihuza abanyamabanga nshingwabikorwa b’imirenge n’abayobozi b’amashami mu karere, ndetse n’umuryango FVA wakuzanyije ibi byifuzo by’abaturage bifuza ko byazitabwaho mu igenamigambi ry’Akarere.
Faith Victory Association(FVA) ibinyujije mu mushinga wayo PPIMA ivuga ko mu ikusanyamakuru hari ibibazo babonye byabashije gukemuka ariko hakiri n’ibindi bitarakemuka, nk’uko umuyobozi w’umushinga Gakwaya Jean Marie Vianney.
Ati “Abaturage baba bagaragaza ibikorwa byashakirwa ingengo y’imari, twasanze hari ibyabashije gukemukira ku rwego rwo hasi, ariko harimo n’ibindi bibazo bigikomeye birimo ubucucike bw’abana bari mu mashuri, intebe zo kwicaraho, amarerero akiri make mu midugudu, ingo zitarabona amashanyarazi, ibibazo biracyarimo bikeneye ingengo y’imari mu karere ka Bugesera.”
Sebarundi Ephrem umunyamabanga nshingwabikorwa w’Umurenge wa Ririma akaba anahagarariye abayobozi b’imirenge(doyen)mu Karere ka Bugesera yavuze ko hari bimwe mu bibazo byagaragajwe bigiye gushyirwamo imbaraga bigakemuka, harimo n’ibyo kubura aho abana bicara mu ishuri.
Ati ”Mu byo tugiye gushyiramo imbaraga hari ibibazo bidasaba ingengo y’imari. Muri byo, hari imikorere itishimirwa n’abaturage y’ibigo bimwe na bimwe nka ‘Poste de Santé’ abaturage banenga imikorere yazo, ariko kuko biri mu nshingano zacu dufashe umwanzuro wo guhwitura abakozi bazo tubagaragarize ibishimwa n’ibigawa kugirango babikosore.”
Akomeza avuga ko hari n’ibindi bibazo by’amavuriro adasobanurira neza abarwayi nk’ugiye kwivuza yakenera ‘ambulance’ akayibura yajyanye undi murwayi ku kindi kigo nderabuzima, “icyo gihe bisaba ko asobanurirwa.”
Sebarundi mu byo kandi bazashyiramo ingufu harimo ibibazo by’ubucucike mu mashuri, aho agira ati “Abayobozi batandukanye ku rwego rw’umurenge bihaye gahunda yo kwishakamo ibisubizo by’intebe ahantu hanyuranye nibura kugira ngo abo bana bige bameze neza”.
Uyu mushinga PPIMA wakoze igice cya mbere kuva muri Mutarama – Kamena 2024 naho igice cya kabiri kuva Nyakanga- Ugushyingo. Umaze umwaka umwe ushyirwa mu bikorwa na FVA ku nkunga ya NPA, n’ubwo umaze imyaka 3 muri Bugesera, ukaba ukorera mu turere 19, aho ushyirwa mu bikorwa na FVA ni Bugesera, Rusizi, Ruhango, Nyanza na Gisagara.
Naomi Irakoze Mugaragu.
