Kuri uyu wa Gatanu tariki 17 Gashyantare 2023, Perezida Paul Kagame yahuye n’Umunyamabanga Mukuru w’Umuryango w’Abibumbye, Antonio Guterres baganira ku bibazo by’umutekano mu karere ndetse n’ingamba zakunganira izafashwe ku rwego rw’akarere.
Bahuriye Addis Abeba muri Ethiopie, ahari kubera inteko ya 36 isanzwe y’Abakuru b’Ibihugu bigize Umuryango wa Afurika Yunze Ubumwe.
Ubutumwa bwanyuze ku rukuta rwa Twitter rw’Ibiro by’Umukuru w’Igihugu, Village Urugwiro, buvuga ko Perezida Kagame na Guterres banaganiriye ku bufatanye bw’u Rwanda na Loni by’umwihariko mu bijyanye n’ubutumwa bwo kugarura amahoro, ibyo kugera ku ntego z’iterambere rirambye n’ibindi.
President Kagame met with the United Nations Secretary-General @antonioguterres for a discussion on regional security and solutions that support regional mechanisms and processes. They also discussed UN-Rwanda areas of partnerships in peacekeeping, achieving SDGs among others. pic.twitter.com/XNKae6CLld
— Presidency | Rwanda (@UrugwiroVillage) February 17, 2023
Aba bayobozi bombi bahuye mu gihe ibibazo by’umutekano muke mu Burasirazuba bwa Repubulika Iharanira Demokarasi ya Congo bikomeje gufata indi ntera, aho imirwano hagati y’ingabo za Leta (FARDC) n’umutwe wa M23 ikomeje.
Ni mu gihe kandi u Rwanda rukomeje kwakira impunzi zo muri Congo ziganjemo abavuga Ikinyarwanda bakomeje kugirirwa nabi bigizwemo uruhare n’inzego za Leta n’abaturage, ntihafatwe ingamba zikomeye.
Intumwa y’Umunyamabanga Mukuru wa Loni ishinzwe gukumira Jenoside, iherutse gusohora itangazo rigaragaza ko ibiri gukorerwa abavuga Ikinyarwanda muri Congo biganisha kuri Jenoside.
Uko guhura kandi kwakurikiye inama y’abakuru b’ibihugu byo mu karere yabereye Addis Abeba kuri uyu wa Gatanu, igamije kureba ishyirwa mu bikorwa ry’ingamba zigamije gushakira ibisubizo ibibazo by’umutekano muri Congo.
Perezida Kagame yaherukaga guhura na Guterres mu Ukwakira 2022, mu biganiro byibanze ku bibazo by’umutekano mu Burasirazuba bwa Congo.
Perezida Kagame na Antonio Guterrres bahuriye Addis Abeba kuri uyu wa Gatanu
Perezida Kagame na Guterres baganiriye ku bibazo by’umutekano mu Burasirazuba bwa Congo
