Perezida wa Repubulika, Paul Kagame, yagaragaje ko abantu badakwiye guheranwa n’ibihe by’agahinda n’ibibatandukanya by’amateka y’ahahise, ahubwo hakibandwa ku bifitiye abaturage akamaro mu gihe kizaza.
Umukuru w’Igihugu, ibi yabigarutseho ubwo yagezaga ijambo ku bitabiriye inama ihuza Arabia Saoudite na Afurika, yatangiye kuri uyu wa Gatanu tariki 10 Ugushyingo 2022, igamije gushimangira umubano ushingiye ku bukungu na politiki hagati y’utu turere twombi.
Iyi nama iri kubera i Riyadh, ihurije hamwe igikomangoma cya Arabia Saoudite akaba na Minisitiri w’Intebe, Mohammed bin Salman Al Sauda n’Abakuru b’ibihugu batandukanye bo ku mugabane wa Afurika, barimo Perezida wa Mozambique, Filipe Jacinto Nyusi, Perezida wa Côte d’Ivoire, Alassane Ouattara, Mamadi Doumbouya uyoboye Guinée-Conakry mu buryo bw’inzibacyuho, Perezida Evariste Ndayishimiye w’u Burundi na Perezida wa Zimbabwe, Emmerson Mnangagwa.
Hari kandi Perezida wa Repubulika ya Santrafurika, Prof. Faustin Archange Touadéra, Perezida wa Sudani y’Epfo, Salva Kiir, Perezida wa Comores uyoboye umuryango wa Afurika yunze Ubumwe, Azali Assoumani, Perezida wa Zambia, Hakainde Hichilema ndetse na Minisitiri w’Intebe wa Ethiopia, Dr Abiy Ahmed n’abandi.
Perezida Kagame yavuze ko ibibazo by’ubukungu ndetse n’ibya politiki byugarije Isi muri rusange, bigaragaza ko hakenewe ubufatanye bwa buri wese, mu gushaka ibisubizo bya bimwe mu bibazo bibangamiye uturere ibihugu bibarizwamo.
Yakomeje avuga ko nk’umuganane wa Afurika hari amwe mu masomo ugenda ukura mu bibazo uhura nabyo, harimo nk’uburyo bw’ubufatanye no gushyira hamwe kw’ibihugu biwugize, ndetse bikajyana no gukorana n’abafatanyabikorwa nka Arabia Saoudite n’abandi batandukanye.
Umukuru w’Igihugu yavuze ko n’ubwo haba hari ibibazo by’ingutu, ariko iteka haba hari n’uburyo bwo kubishakira ibisubizo ndetse n’uko bigomba gushyirwa mu bikorwa, ariko bikajyana n’imyumvire. Yaboneraho kugaragaza ko abantu badakwiye guheranwa n’ibihe by’amateka y’ahahise, ahubwo hakibandwa ku gushakira abaturage ibibafitiye akamaro mu gihe kizaza.
Ati “Ntidukwiye guheranwa n’ibihe by’agahinda n’ibidutandukanya by’amateka y’ahahise, ahubwo tukarazwa inshinga n’ibifitiye abaturage akamaro mu gihe kizaza. Ubutumire bwo guhurira hano ni amahirwe yo gukorera hamwe, gushaka ibisubizo, ndetse n’uburyo bw’ishoramari rikenewe mu kugera ku bisubizo.”
Perezida Kagame yavuze ko umwanya w’inama nk’iyo atari iby’agaciro ku ruhande rumwe rw’umugabane wa Afurika gusa, ahubwo gufatanyiriza hamwe kw’impande zombi bizarushaho kongera imbaraga.
Abayobozi ba Arabia Saoudite, bagaragaza ko iki gihugu ari umufatanyabikorwa w’umugabane wa Afurika binyuze mu kigega cyayo gishinzwe iterambere, aho kigira uruhare runini mu bikorwa bitandukanye birimo guteza imbere ibikorwa remezo, imibereho myiza y’abaturage n’ibindi.
Perezida Kagame yishimiye umubano usanzwe uranga abayobozi ba Arabia Saoudite n’umugabane wa Afurika, ndetse ko ubu bufatanye hagati y’impande zombi bukomeje gutera imbere ku rwego rwo hejuru, atanga urugero rwo kuba iki gihugu mu 2020, ubwo cyakiraga inama y’Ibihugu 20 bikize ku Isi, G20, cyaragize uruhare mu gusaba ko umugabane wa Afurika wakoroherezwa kubona inkingo za COVID-19 ku biciro byoroshye.
Perezida Kagame yashimye kandi amasezerano y’ubufatanye yashyizweho umukono ku wa Kane, hagati y’u Rwanda na Arabia Saoudite, binyuze muri gahunda ya ‘Oil Sustainability Program’.
Ni gahunda igamije gufasha ibihugu byo ku mugabane wa Afurika mu cyiswe ‘Empowering Africa’, ku gukoresha imbaraga zitangiza ikirere, ikoranabuhanga mu buzima, mu burezi nk’ibisubizo bigamije kuzamura imibereho myiza n’iterambere rirambye muri Afurika.
Arabia Saoudite ndetse n’umugabane wa Afurika birifuza imikoranire mu buryo bwagutse binyuze mu biganiro bya politiki, ibikorwa remezo by’inganda, kurengera ibidukikije, ingufu, ubwikorezi, amahoro n’umutekano, kurwanya ubuhezanguni n’iterabwoba, gutezimbere inzego z’ubuzima, uburezi, ibikorwa by’ubutabazi, kwihaza mu biribwa n’ibindi.
Source Kigali today
